இ-விசா, போலி இணையதளங்கள்: இந்திய தூதரகம் எச்சரிக்கை

வாஷிங்டன்: இந்திய அரசின், இ-டூரிஸ்ட் விசா வழங்கும் இணைய தளத்தை போலவே, அதே வடிவிலான போலி இணைய தளங்கள் செயல்பட்டு வருவதாகவும், அவை குறித்து மக்கள் எச்சரிக்கையாக இருக்க வேண்டும் என்றும், வாஷிங்டனில் உள்ள இந்திய தூதரகம் விண்ணப்பதாரர்களை எச்சரித்துள்ளது.

                                          

போலிகள்:

இது குறித்து, இந்திய தூதரகம், டிசம்பர் 27 ம் தேதியிட்டு வெளியிட்டுள்ள அறிக்கை:
இ-டூரிஸ்ட் விசா சேவை இணையதளம் என்ற பெயரில், இந்திய அரசின் இணையதளம் போலவே பல போலி இணையதளங்கள் செயல்பட்டு வருவதாக எங்களுக்கு தகவல்கள் கிடைத்துள்ளது. இந்த இணையதளங்கள், விண்ணப்பதாரர்களை பல்வேறு வழிகளில் மோசடி செய்து வருகின்றன என்றும் புகார் கூறப்படுகிறது. 
e-touristvisaindia.com; indianvisaonline.org.in; e-visaindia.com; indiavisa.org.in போன்ற இணையதளங்கள், இந்திய அரசின் இ-டூரிஸ்ட் விசா இணையதளங்கள் போலவே போலியாக செயல்பட்டு வருகின்றன. இந்நிலையில், விண்ணப்பதாரர்கள், indianvisaonline.gov.in என்ற அரசின் சரியான இணையதளம் மூலம் இ- டூரிஸ்ட் விசா சேவைகளை பெற வேண்டும் என்றும், இது சம்பந்தமாக வேறு எந்த இணையதளத்தையும் தொடர்பு கொள்ள வேண்டாம் என்றும் கேட்டுக் கொள்ளப்படுகிறார்கள். 
இ-டூரிஸ்ட் விசா தவிர மற்ற வழக்கமான விசா தேவைகளுக்கு, அமெரிக்காவில் உள்ள இந்தியர்கள் www.ckgs.us என்ற இணையதளத்தின் மூலம் விண்ணப்பிக்கலாம். 
இவ்வாறு அந்த அறிக்கையில் கூறப்பட்டுள்ளது.